ເງື່ອນໄຂສຳລັບເງິນກູ້ຍ່ອຍ ທີ່ປ່ອຍໃຫ້ຫົວໜ່ວຍ MSMEs
ຫົວໜ່ວຍ MSMEs ທີ່ເປັນເປົ້າໝາຍຜູ້ກູ້ຢືມຍ່ອຍພາຍໃຕ້ທຶນຈາກກອງທຶນ LAFF ແມ່ນລວມທັງຫົວໜ່ວຍວິສາຫະກິດທີ່ຍັງບໍ່ທັນໄດ້ຈົດທະບຽນ ແລະ ຄົວເຮືອນທີ່ປະຕິບັດກິດຈະກຳທີ່ເປັນເສດຖະກິດ. ທືນເງິນກູ້ຈາກກອງທຶນ LAFF ແມ່ນຈະຕ້ອງຖືກນຳໃຊ້ເພື່ອປ່ອຍກູ້ໃຫ້ແກ່ກິດຈະກຳທີ່ເປັນເສດຖະກິດ ຈັດຕັ້ງປະຕິບັດໂດຍຫົວໜ່ວຍ MSMEs ເພື່ອລົງທຶນສ່ວນຫຼາຍໃສ່ “ຊັບສິນຄົງທີ່” ຫຼື ການຂະຫຍາຍທຸລະກິດ.[1] [2] ຕາມຫຼັກການແລ້ວ, ທຶນເງິນກູ້ຈາກກອງທຶນ LAFF ແມ່ນສາມາດນຳໃຊ້ເຂົ້າໃນການລົງທຶນໃສ່ທຸກໆຂະແໜງການ. ແຕ່ເຖິງຢ່າງໃດກໍ່ຕາມ, ສະຖາບັນການເງິນທີ່ຈະເປັນຄູ່ຮ່ວມງານ (PFIs) ແມ່ນຈະຕ້ອງໄດ້ປ່ອຍກູ້ຍ່ອຍໃຫ້ແກ່ຂະແໜງການກະສິກຳຢ່າງໜ້ອຍ 30% ຂອງຈຳນວນເງິນກູ້ຍ່ອຍທັງໝົດ[3] ແລະ ບໍ່ອະນຸຍາດໃຫ້ປ່ອຍກູ້ແກ່ບັນດາກິດຈະກຳທີ່ລະບຸໄວ້ໃນບັນຊີລາຍການກິດຈະກຳຍົກເວັ້ນຂອງໂຄງການກອງທຶນ LAFF, ເຊີ່ງໃຫ້ຍົກເວັ້ນບັນດາກິດຈະກຳທີ່ເປັນອັນຕະລາຍສູງເທົ່ານັ້ນ.[4] ໃນແງ່ຂອງພື້ນທີ່ການດຳເນີນງານ, ເງິນກູ້ຍ່ອຍທີ່ປ່ອຍກູ້ໂດຍທຶນຂອງກອງທຶນ LAFF ແມ່ນສາມາດປ່ອຍໃຫ້ໄດ້ທົ່ວປະເທດ ຍົກເວັ້ນສະເພາະແຕ່ເຂດພື້ນທີ່ທີ່ຂື້ນກັບສາມເມືອງຂອງນະຄອນຫຼວງວຽງຈັນ.[5] ສຸດທ້າຍ ແຕ່ເປັນສີ່ງທີ່ສຳຄັນຫຼາຍນັ້ນກໍ່ຄືວ່າ ເງິນກູ້ຍ່ອຍແມ່ນຈະຕ້ອງໄດ້ປະຕິບັດຕາມຫຼັກການຂອງການປົກປ້ອງລູກຄ້າ (Client Protection Principles)[6] ແລະ ດຳລັດວ່າດ້ວຍການປົກປ້ອງຜູ້ຊົມໃຊ້ການບໍລິການດ້ານການເງິນ.[7] ຂ້າງລຸ່ມນີ້ແມ່ນເປັນການສັງລວມເງື່ອນໄຂຕົ້ນຕໍສຳລັບເງິນກູ້ຍ່ອຍ:
ສັງລວມເງື່ອນໄຂຕົ້ນຕໍສຳລັບເງິນກູ້ຍ່ອຍ:
- ວົງເງິນກູ້: ຕ່ຳສຸດ 2 ລ້ານກີບ ແລະ ສູງສຸດ 500 ລ້ານກີບ.
- ອັດຕາດອກເບ້ຍ: ເປັນອັດຕາຕາມກົນໄກຕະຫຼາດ ໂດຍອີງຕາມນະໂຍບາຍສິນເຊື່ອຂອງ
- ກຳນົດເວລາສະເລ່ຍ: ຢ່າງໜ້ອຍ 18 ເດືອນ ໂດຍສະເລ່ຍ, ແຕ່ມີການປັບໄດ້ສຳລັບ ສກຈຮ.
- ຊ່ວງພັກຊຳລະຕົ້ນທຶນ: ໜື່ງສ່ວນສາມຂອງກຳນົດເວລາຂອງເງິນກູ້.
ນອກຈາກເງື່ອນໄຂຕ່າງໆທີ່ໄດ້ກ່າວມາຂ້າງເທິງນັ້ນແລ້ວ, PFI ຈະຕ້ອງໄດ້ມີການອອກແບບ ວິທີການປ່ອຍກູ້ ແລະ ຜະລິດຕະພັນເງິນກູ້ ເພື່ອສົ່ງເສີມ MSME ລວມທັງຕາຕະລາງເວລາຂອງງວດຈ່າຍດອກເບ້ຍ ແລະ ຊຳລະຕົ້ນທຶນ ໂດຍສອດຄ່ອງກັບນະໂຍບາຍສິນເຊື່ອຂອງ PFI ທີ່ມີໃນປະຈຸບັນ.
[1] ກິດຈະກຳທີ່ເປັນເສດຖະກິດ ແມ່ນເປັນກິດຈະກຳທີ່ສ້າງລາຍຮັບໃຫ້ແກ່ຄົວເຮືອນ ນອກຈາກການບໍລິໂພກພາຍໃນຄົວເຮືອນ..
[2] ຊັບສິນຄົງທີ່ ໝາຍເຖິງຊັບສິນທີ່ສືບຕໍ່ສ້າງມູນຄ່າໃຫ້ແກ່ຂະບວນການຜະລິດ ຫຼາຍກວ່າຮອບວຽກການຜະລິດໜື່ງ; ໃນກໍລະນີຂອງ MSMEs ຄຳວ່າ “ຊັບສິນຄົງທີ່” ສ່ວນຫຼາຍຈະບໍ່ແມ່ນຊັບສິນທີ່ມີມູນຄ່າດ້ານການເງິນຕ່ຳ ແລະ ອາຍຸການດ້ານເສດຖະກິດທີ່ສັ້ນ; ຍ້ອນແນວນັ້ນ, ການລົງທຶນຂອງ MSMEs ບາງຄັ້ງກໍ່ມີຄວາມຫຍຸ້ງຍາກໃນການຈຳແນກ ລະຫວ່າງ “ທຶນໝູນວຽນ” ແລະ ບໍ່ໄດ້ແຍກອອກຈາກໃບສະເໜີຂໍເງິນກູ້ ທີ່ໄດ້ຮັບການອະນຸມັດ.
[3] ການຜະລິດກະສິກຳ ທີ່ກຳນົດໂດຍໂຄງການກອງທຶນ LAFF ລວມມີ ການປູກພືດເສດຖະກິດ, ການລ້ຽງສັດທຸກປະເພດ ລວມທັງສັດນ້ຳ, ສັດບົກ, ການປູກພືດສວນຄົວ, ການຫາປາ ແລະ ຄ້າຂາຍປາ, ແລະ ເຄື່ອງປ່າຂອງດົງຕ່າງໆ.
[4] ບັນຊີລາຍການກິດຈະຍົກເວັ້ນ ເຊີ່ງບໍລວມເອົາກິດຈະກຳທີ່ເປັນເສດຖະກິດ ແຕ່ມີຄວາມເປັນອັນຕະລາຍສູງ. ລາຍລະອຽດເບີ່ງໃນເອກະສານຊ້ອນທ້າຍ 2.
[5] ເມືອງເຫຼົ່ານີ້ແມ່ນ: ເມືອງຈັນທະບຸລີ (ລະຫັດເມືອງ 0101); ເມືອງໄຊເສດຖາ (ລະຫັດເມືອງ 0103); ເມືອງສີສັດຕະນາກ (ລະຫັດເມືອງ 0104).
[6] ຫຼັກການປົກປ້ອງລູກຄ້າຂອງ SMART-campaign: https://www.smartcampaign.org/about/smart-microfinance-and-the-client-protection-principles. ສະຖາບັນທີ່ສະເໜີຂໍທຶນແມ່ນລະດົມໃຫ້ລະບຸໃສ່ໃນໜັງສືສະແດງເຈດຈຳນົງ ເຖິງແມ່ນວ່າຈະຄິດວ່າຕົນເອງບໍ່ໄດ້ປະຕິບັດໄດ້ຢ່າງເຕັມສ່ວນກໍ່ຕາມກ່ຽວກັບຫຼັກການປົກປ້ອງລູກຄ້າ.
[7] GoL/225, 06/04/2020.